Zer da Whois.eus?

WHOIS.eus

Tresna honekin edozein domeinu-izenen erregistroan erabilitako informazioa eta bere eskuragarritasuna ikusi ahalko dituzu.

Domeinu-izen bat bilatzean (.eus edo beste edozein) WHOIS.eus-ek erregistratuta dagoen erakutsiko dizu eta, erregistratuta badago, domeinu-izenaren informazio esanguratsuena bistaratuko du, esate baterako, iraungitze-data, jabearen kontaktu-informazioa, etab.

WHOIS kontsultaren eremuak

Domeinu-izen baten bilaketa egiten duzunean domeinu-izen horren WHOIS informazioa bistaratuko da. Erakusten duen eremu bakoitzaren esanahia argiago gera dadin, jarraian WHOIS kontsulta baten eremu ezberdinak azaltzen dira:

• Domeinuaren egoerak:
• addPeriod: Domeinu-izena erregistratu osteko lehen bost egunen epean dago. Bost egun horiek pasa aurretik erregistroa ezabatuz gero titularrari domeinu-izenagatik ordaindutako dirua itzuliko zaio.
• autoRenewPeriod: Domeinu-izena automatikoki berritu da. Domeinuaren jabeak 45 egun dauzka berritze hori ezeztatzeko.
• inactive: Domeinu-izenak ez du esleitutako izen-zerbitzaririk. Hori dela eta, domeinu-izena ez dago erabilgarri.
• ok: Domeinu-izen baten ohiko egoera.
• pendingCreate: Domeinu-izena erregistratze prozesuan dago.
• pendingDelete: Domeinu-izena ezabatze prozesuan dago.
• pendingRenew: Domeinu-izena berritze prozesuan dago.
• pendingRestore: Domeinu-izena berrezartze prozesuan dago, ezabatua izan ondoren. Bukatzean domeinu-izena erabilgarri egongo da berriz ere.
• pendingTransfer: Domeinu-izena beste erregistratzaile batera transferitzeko eskaera prozesatzen ari da. Gehienez ere 5 egunetan domeinu-izena erregistratzaile berrian egongo da.
• pendingUpdate: Domeinu-izena eguneratzeko eskaera jaso da eta prozesatzen ari da.
• redemptionPeriod: Domeinu-izena ezabatu egingo da ezabatze agindua eman zen egunetik 30 egunetara. Titularrak epe hori dauka ezabatzea ezeztatzeko, domeinu-izen hori berrezarriz.
• renewPeriod: Domeinu-izena berritu egin da. Domeinu-izenaren jabeak berritzea burutu osteko lehen bost egunetan berritze hori ezeztatu ahalko du eta berritzearengatik ordaindutako dirua itzuliko zaio.
• clientDeleteProhibited/serverDeleteProhibited: Domeinu-izena ezabatzea eragozten du egoera honek.
• clientHold/serverHold: Domeinu-izenaren DNS ezarpenak ez daude izen-zerbitzari nagusietan jarrita eta, beraz, domeinu-izena ez da erabilgarri egongo.
• clientRenewProhibited/serverRenewProhibited: Domeinu-izena berritzea eragozten du egoera honek.
• clientTransferProhibited/serverTransferProhibited: Domeinu-izena beste erregistratzaile batera transferitzea eragozten du egoera honek. Domeinu-izen bat erregistratu edo beste erregistratzaile batetara transferitu berritan, 60 egun itxaron behar dira transferitu ahal izateko.
• clientUpdateProhibited/serverUpdateProhibited: Domeinu-izena eguneratzea eragozten du egoera honek.
• transferPeriod: Domeinu-izena transferitu ostean, titularrak bost egun ditu eragiketa ezeztatzeko. Ezabatzekotan titularrari transferentzia egiteagatik ordaindutako dirua itzuliko zaio.
• Erregistratze-data: Domeinu-izena erregistratua izan den data.
• Iraungitze-data: Domeinu-izena berritzeko epea. Domeinu-izena iraungituz gero beste edonork erregistratzeko eskuragarri egongo da.
• Azken eguneraketa: Domeinu-izenaren informazioa eguneratu den azken aldia.
• Erregistratzailea: Domeinu-izenaren kudeaketa erregistratzaile horrekin egingo da.
• Titularraren kontaktu-informazioa: Domeinu-izena erregistratu duen pertsona edota erakundearen kontaktu-informazioa.
• Kontaktu teknikoaren informazioa: Domeinu-izenaren kudeaketa teknikoaren arduradunaren kontaktu-informazioa.
• Kontaktu administratiboaren informazioa: Domeinu-izenaren kudeaketa administratiboaren arduradunaren kontaktu-informazioa.
• Izen-zerbitzariak: Domeinu-izenak erabiltzen dituen DNS izen-zerbitzariak.

WHOIS-aren funtzionamendua

Webgune honetan bistaratzen den informazioa domeinuen WHOIS datu-baseetatik eskuratu da. Domeinu bakoitzak datu-base bat dauka, bere domeinu-izen guztien informazioa gordetzen duena. Datu-base horiek gordetzen duten informazioa publikoa da eta informazio edonork kontsulta dezake horretarako publikoki eskuragarri dauden tresnak erabilita. Bi tresna mota daude: batetik, domeinu bakoitzak domeinu horren domeinu-izenen informazioa kontsultatu ahal izateko eskaintzen duena, eta bestetik, tresna generikoak (whois.eus, adibidez) erabili daitezke domeinu guztien informazioa toki zentralizatu batean kontsultatzeko.

WHOIS informazioa kontsultatzeko modurik ohikoena TCP (Transmission Control Protocol) protokoloaren bidez da. Protokolo horren bidez WHOIS zerbitzariaren eta kontsulta egiten duen zerbitzariaren arteko konexio bat sortzen da, 43. portua erabilita. Konexioa sortzean WHOIS zerbitzariari kontsulta bidaliko dio konexioa sortu duen zerbitzariak, begiratu nahi duen domeinu-izenarekin. Konexio horren bitartez WHOIS zerbitzariak erantzuna bidaliko du, domeinu-izen horri dagokion informazioa itzuliz, dagoeneko erregistratuta egotekotan.

Garapena

WHOIS.eus Bootstrap framework-a erabilita garatu da. Bootstrap HTML, CSS eta JavaScript bidezko web garapena egiteko erabiltzen den framework zabalduenetako bat da, interfazearen diseinurako ematen dituen aukerengatik, diseinu arduratsua duten aplikazioak egin ahal izatea barne. 
Bootstrap kode irekikoa da, edonork har dezake iturburu-kodea bere proiektuetan erabiltzeko, eta bere beharretara moldatu. Bootstrap-ek MIT lizentzia dauka.

Domeinu-izenen informazioa kontsultatzeko bi zerbitzu erabili dira. Batetik, .EUS domeinu-izenen informazioa lortzeko PuntuEUS Fundazioaren datu-basea erabili da. Bestetik, gainontzeko domeinuen informazioa eskuratzeko WhoisXMLAPI zerbitzua erabili da.